নিউজ ডেস্কঃ লুইতৰ বুকু ভেদি অচিৰেই নিৰ্মাণ হ’ব মেগা সুৰংগ। গহপুৰ আৰু নুমলীগড় সংযোগী প্ৰস্তাৱিত সুৰংগটোৰ বাবে অনুমোদন জনাইছে নেশ্যনেল ব’ৰ্ড ফৰ ৱাইল্ড লাইফ চমুকৈ এন বি ডব্লিউ এলে। অৱশ্যে ইয়াৰ সমান্তৰালভাৱে কেইটামান কঠোৰ চৰ্তও বান্ধি দিছে সমিতিখনে। প্ৰকল্পটোৰ সম্ভাৱ্য মাটিৰ স্থিৰতা, ভূগৰ্ভস্থ পানীৰ প্ৰবাহ, পলসৰ গতিশীলতা আৰু ভূমিকম্পীয় দুৰ্বলতাৰ ওপৰত সম্যক বৈজ্ঞানিক বিশ্লেষণৰ নিৰ্দেশ দিছে এন বি ডব্লিউ এলে।
এই প্ৰকল্প ৰূপায়ণৰ সময়ত বন্যপ্ৰাণী আৰু ইয়াৰ বাসস্থানৰ ওপৰত কোনো বিৰূপ প্ৰভাৱ নপৰে বুলি কমিটীয়ে স্পষ্ট কৰি দিছে। ইউজাৰ এজেন্সী এন এইচ আই ডি চি এলক অসমৰ মুখ্য বন্যপ্ৰাণী ৱাৰ্ডেনৰ একাউণ্টত ধন জমা দিবলৈ কোৱা হৈছে। এই পুঁজিৰ সহায়ত প্ৰকল্পৰ কাৰ্যকলাপৰ সম্ভাৱ্য প্ৰভাৱ কম কৰা হ’ব।
একে সময়তে মানৱ-জীৱ-জন্তুৰ সংঘাত প্ৰশমন আৰু বন্যপ্ৰাণী সংৰক্ষণ আৰু পৰিচালনাৰ বৈজ্ঞানিক পৰিকল্পনা প্ৰস্তুত কৰাটো বাধ্যতামূলক কৰা হৈছে।
উল্লেখ্য যে, চাৰিলেনযুক্ত এই সুৰংগ নিৰ্মাণৰ বাবে কাজিৰঙা ব্যঘ্ৰ সংৰক্ষিত বনাঞ্চলৰ টাইগাৰ কৰিডৰৰ পৰা প্ৰায় ১৩.৭৭ হেক্টৰ বনভূমি আৰু কাজিৰঙা ব্যঘ্ৰ সংৰক্ষিত বনাঞ্চলৰ পৰিৱেশ সংবেদনশীল অঞ্চলৰ পৰা ৬১.৫০২৮ হেক্টৰ অবনভূমিৰ প্ৰয়োজন হ’ব। ৰাষ্ট্ৰীয় ব্যঘ্ৰ সংৰক্ষণ কৰ্তৃপক্ষই (এন টি চি এ) এই প্ৰস্তাৱত কিছুমান চৰ্ত সাপেক্ষে অনুমোদন দিয়াৰ পৰামৰ্শ আগবঢ়াইছে।
