নিউজ ডেস্কঃ উৰণৰ কিছু সময়ৰ পিছতে সংঘটিত হ’ল ভয়ংকৰ বিমান দুৰ্ঘটনা। লণ্ডন অভিমুখী এয়াৰ ইণ্ডিয়া বিমান AI171 বৃহস্পতিবাৰে বিয়লি আহমেদাবাদ বিমানবন্দৰৰ সমীপৰ মেঘনীনগৰ অঞ্চলত দুৰ্ঘটনাগ্ৰস্ত হয়। যদিও এতিয়ালৈকে হতাহতৰ সংখ্যা নিশ্চিতভাৱে জানিব পৰা হোৱা নাই, তথাপিও বহু লোকৰ প্ৰাণ হেৰুৱাৰ আশংকা কৰা হৈছে।
দুপৰীয়া প্ৰায় ২ বজাত আহমেদাবাদ আন্তঃৰাষ্ট্ৰীয় বিমানবন্দৰৰ পৰা উৰা মাৰে AI171 যাত্ৰীবাহী বিমানখনে। আৰক্ষীয়ে জনোৱা মতে, উৰণৰ কিছু সময়ৰ পিছতে মেঘানীনগৰৰ জনবসতিপূৰ্ণ এলেকাত বিমানখন দুৰ্ঘটনাগ্ৰস্ত হয়। ভয়ংকৰ শব্দৰে সমগ্ৰ অঞ্চলটো কঁপি উঠে। নিমিষতে আকাশখন ক’লা ধোঁৱাই আৱৰি ধৰে। এই খবৰ পোৱাৰ লগে লগে ঘটনাস্থলীত উপস্থিত হয় অগ্নিনিৰ্বাপক বাহিনী আৰু উদ্ধাৰকাৰী দল।
অগ্নিনিৰ্বাপক বাহিনীৰ বিষয়া জয়শ খাদিয়াই জানিবলৈ দিয়া মতে, জুই নিয়ন্ত্ৰণ কৰিবলৈ বহু অগ্নিনিৰ্বাপক বাহিনীৰ ইঞ্জিন প্ৰেৰণ কৰা হৈছে। উদ্ধাৰৰ কাম আৰম্ভ হৈছে। এজন প্ৰশাসনিক বিষয়াই জনোৱা মতে, ইতিমধ্যে বহু আহত লোকক মহানগৰীৰ অসামৰিক চিকিৎসালয়লৈ লৈ যোৱা হৈছে।
এই সন্দৰ্ভত আহমেদাবাদৰ উপায়ুক্ত কানন দেশাইক সোধাত তেওঁ কয় যে, “আমি হতাহতৰ সবিশেষ সংগ্ৰহ কৰি আছো। আমি বৰ্তমান একো নিশ্চিত কৰিব নোৱাৰো।”
ইফালে এয়াৰ ইণ্ডিয়াই নিজৰ অফিচিয়েল এক্স (পূৰ্বৰ টুইটাৰ) একাউণ্টত কয়, “আজি ১২ জুন ২০২৫ তাৰিখে আহমেদাবাদ-লণ্ডন গেটৱিকৰ পথত থকা বিমান AI171 য়ে দুৰ্ঘটনাৰ সন্মুখীন হয়।
Live Video Of Plane Crash
— Yash (@itsmeeyashin) June 12, 2025
The Possibilities Of Surving Of Passengers is zero pic.twitter.com/FdHB7tSzt1
স্থানীয় সূত্ৰৰ পৰা জানিব পৰা মতে, দুৰ্ঘটনা সংঘটিত হোৱাৰ লগে লগে আৰক্ষীয়ে অঞ্চলটো ঘেৰাও কৰে। নিৰাপদে খালী কৰা হয় বাসিন্দাসকলক। আহতসকলক ততাতৈয়াকৈ চিকিৎসালয়লৈ প্ৰেৰণ কৰাৰ লগতে উদ্ধাৰ অভিযান পূৰ্ণগতিত অব্যাহত আছে।
বিমানখনত কিমানজন যাত্ৰী আছিল আৰু কিমানজন আহত বা নিহত হৈছিল সেয়া এতিয়াও স্পষ্ট হোৱা নাই। বাতৰি অনুসৰি, দুৰ্ঘটনাৰ সময়ত বিমানখনত ক্ৰু মেম্বাৰসহ আছিল ২৪২ গৰাকী যাত্ৰী। দুৰ্ঘটনাটোত আটাইৰে মৃত্যুৰ আশংকা কৰা হৈছে।
