গুজৰাটৰ আহমেদাবাদত সংঘটিত দেশৰ ইতিহাসৰ আটাইতকৈ ভয়ানক বিমান দুৰ্ঘটনাটোত একমাত্ৰ জীৱিত ব্যক্তি হিচাপে প্ৰাণ ৰক্ষা পৰে বৃটিছ নাগৰিক বিশ্বাস কুমাৰ ৰমেশৰ।
উল্লেখ্য যে, বৃহস্পতিবাৰে বিয়লি সংঘটিত হোৱা এয়াৰ ইণ্ডিয়া ফ্লাইট এআই-১৭১ৰ কৰুণ বিমান দুৰ্ঘটনাত মৃত্যু ঘটে গুজৰাটৰ প্ৰাক্তন মুখ্যমন্ত্ৰী বিজয় ৰূপানীৰো। লণ্ডন অভিমুখী বিমান এ আই-১৭১ আহমেদাবাদৰ পৰা উৰণৰ কিছু সময়ৰ পাছতে দুৰ্ঘটনাগ্ৰস্ত হৈ ভাগি পৰে এখন চিকিৎসা মহাবিদ্যালয়ৰ আৱাসিক হোষ্টেলত।
দুৰ্ঘটনাটোৰ সময়ত বিমানখনত আছিল ক্ৰু মেম্বাৰসহ ২৪২ জন লোক।
আহমেদাবাদৰ অসামৰিক চিকিৎসালয়ৰ আছাৰৱাৰ জেনেৰেল ৱাৰ্ডত বৰ্তমান চিকিৎসাধীন হৈ থকা ৪০ বছৰীয়া ব্ৰিটিছ নাগৰিক বিশ্বাস কুমাৰ ৰমেশে দাবী কৰে যে বিমান দুৰ্ঘটনাত তেৱেই একমাত্ৰ জীৱিত ব্যক্তি।
বিভীষিকাৰ বৰ্ণনা কৰি তেওঁ কয়, “টেক অফৰ ত্ৰিশ ছেকেণ্ডৰ ভিতৰতে এটা ডাঙৰ শব্দ হৈছিল আৰু তাৰ পিছতে বিমানখন দুৰ্ঘটনাগ্ৰস্ত হৈছিল। এই সকলোবোৰ ইমান দ্ৰুতগতিত হৈছিল যে মূহুৰ্ততে সকলো শেষ হৈ গ’ল।”
বিশ্বাস কুমাৰ ৰমেশে এই দুৰ্ঘটনাত বুকু, চকু আৰু ভৰিত আঘাত পাইছে। ভাৰতত পৰিয়ালক সাক্ষাৎ কৰিবলৈ অহা বিশ্বাসে ভাতৃ অজয় কুমাৰ ৰমেশ (৪৫)ৰ সৈতে ব্ৰিটেইনলৈ উভতি যোৱাৰ সময়তে সংঘটিত হয় এই মৰ্মান্তিক দুৰ্ঘটনা।
