নিউজ ডেস্কঃ লোভ, প্ৰৱঞ্চনা আৰু আত্মসাতৰ পৃথিৱীত মানৱীয়তা এতিয়া কেৱল এক কিতাপৰ আখ্যান। কিন্তু সেই সময়তে সততা আৰু মানৱতাৰ এক অনন্য নিদৰ্শন দাঙি ধৰি নজিৰ গঢ়িবলৈ সক্ষম হ’ল দক্ষিণ মিজোৰামৰ লংটলাই চহৰৰ এজন অটোৰিক্সা চালকে।
মাত্ৰ ২৮ বছৰীয়া হেনৰী লালহামিংলিয়ানাই বৃহস্পতিবাৰে নিশা নিজৰ গাড়ীৰ চিটত এটা “ভাগ্যৰ সন্ধান” পাইছিল- পলিথিনৰ বেগত ভৰাই থোৱা ১৭ লাখ টকা নগদ ধন। প্ৰায়ে ৫০০ টকাতকৈও কম উপাৰ্জন কৰা হেনৰীৰ বাবে এয়া আছিল বিশাল পৰিমানৰ ধন। এই ধনেৰে তেওঁ বহু কিবাকিবিয়েই কৰিব পাৰিলেহেঁতেন। হয়তো এই কথা এখন্তেকৰ বাবে হ’লেও মনলৈও আহিছিল অভাৱত জীৱন নিৰ্বাহ কৰা যুৱকজনৰ।
কিন্তু এটা সততাপূৰ্ণ জীৱন যাপন কৰিবলৈ আগ্ৰহী হেনৰীয়ে এক ব্যতিক্ৰম সিদ্ধান্ত লয়। এই টকাৰ প্ৰকৃত গৰাকীক বিচাৰি তেওঁ উপস্থিত হয় শেষ যাত্ৰীজনক নমাই থৈ অহা হোটেলখনৰ সন্মুখত।
