এক সাক্ষাৎকাৰত নেহাই এই কথা অকপটে স্বীকাৰ কৰি কৈছিল, ”মোৰ পিতৃ-মাতৃ বিজেপিৰ ঘোৰ সমৰ্থক। সেয়ে তেওঁলোকৰ সৈতে মোৰ সম্পৰ্কও ভাল নহয়।’’ পৰিয়ালৰ এনে তীব্ৰ মতবিৰোধ আৰু উত্তপ্ত পৰিৱেশৰ মাজতো অৱশ্যে নিজৰ সিদ্ধান্ত সদায় নিজে লৈ গণমুখী পথ বাচি লৈছে নেহাই। আনকি যন্তৰ মন্তৰৰ অনশনৰ সময়ত ছাত্ৰ-ছাত্ৰীৰ ওপৰত চলা আৰক্ষীৰ বৰ্বৰতা নিজ চকুৰে প্ৰত্যক্ষ কৰাৰ পিছত তেওঁৰ নিজৰ বিজেপি সমৰ্থক মাতৃয়েও এই আন্দোলনক প্ৰশংসা কৰিবলৈ বাধ্য হৈছিল।
আজি সমগ্ৰ দেশৰ ৰাজনীতি কঁপাই থকা এই নেহা বোৰাৰ সৈতে অসমৰ সম্পৰ্ক কি? নেহাৰ ‘বোৰা’ উপাধিটোৰ বাবেই বহুতে তেওঁক অসমৰ সৈতে সংযোগ স্থাপন কৰি আহিছে। নীট কেলেংকাৰীৰ উত্তাল প্ৰতিবাদৰ সময়ছোৱাতো অসমৰ বহু লোকে সামাজিক মাধ্যমত নেহাক ‘অসমৰ সন্তান’ নাইবা থলুৱা ‘বৰা’ পৰিয়ালৰ কন্যা বুলি দাবী কৰি গৌৰৱ প্ৰকাশ কৰা দেখা গৈছিল। কিন্তু দৰাচলতে নেহা বোৰা অসমৰ নহয়, উত্তৰাখণ্ডৰহে। তেওঁৰ প্ৰকৃত ঘৰ উত্তৰাখণ্ডৰ খটিমাত। সেনা বিষয়া পিতৃৰ সন্তান হোৱাৰ বাবে শৈশৱ বিভিন্ন চহৰত অতিবাহিত হোৱা নেহাই শিলিগুৰিৰ বিদ্যালয়ৰ পৰা স্কুলীয়া শিক্ষা সমাপ্ত কৰিছিল।
উত্তৰাখণ্ডত এই ‘বোৰা’ উপাধিৰ এক সুকীয়া ঐতিহাসিক আৰু সামাজিক পৰিচয় আছে। উত্তৰাখণ্ডৰ কুমাওঁ হিমালয় অঞ্চলৰ আলমোৰা আৰু পিথোৰাগড় জিলাত এই উপাধিৰ লোক বহুলভাৱে বসবাস কৰে। মূলতঃ তাত দুটা সুকীয়া শ্ৰেণীৰ মাজত এই উপাধি দেখা যায়। ইয়াৰে এটা হৈছে পশ্চিম নেপালৰ পৰা প্ৰব্ৰজন কৰা কুমাওঁনীভাষী ‘কুথালিয়া বোৰা’ বা ‘বোৰা কাৰ্কী’ ব্যৱসায়ী সম্প্ৰদায় আৰু আনটো হৈছে কুমাওঁৰ ক্ষত্ৰিয় বৰ্ণৰ ‘বোৰা ৰাজপুত’, যিসকল ঐতিহাসিকভাৱে ভূমিৰ অধিকাৰী তথা প্ৰশাসনিক পদবীত আছিল। অৰ্থাৎ, উত্তৰাখণ্ডৰ এই স্থানীয় ‘বোৰা’ সম্প্ৰদায়ৰ সৈতে অসমৰ থলুৱা ‘বৰা’ উপাধিৰ কোনো ঐতিহাসিক বা বংশগত সংযোগ নাই।
কিন্তু, উত্তৰাখণ্ডৰ এই সংগ্ৰামী জীয়ৰীয়ে আজি নিজৰ পৰিচয় কেৱল কোনো এটা অঞ্চল বা উপাধিতেই আৱদ্ধ নাৰাখি সমগ্ৰ দেশৰ গণতান্ত্ৰিক সংগ্ৰামৰ এক অগ্ৰণী প্ৰতীক হিচাপে প্ৰতিষ্ঠা কৰিবলৈ সক্ষম হৈছে।
