বানত উটি গ’ল কৰিমগঞ্জ বাইপাছ পথ! অসম-ত্ৰিপুৰাৰ মাজত যাতায়ত বিচ্ছিন্ন

নিউজ ডেস্কঃ ৰুষ্ট প্ৰকৃতিৰ কবলত অসম তথা উত্তৰ-পূৰ্বাঞ্চল। বান আৰু ভূমিস্খলনে সংহাৰী ৰূপ ধাৰণ কৰিছে ঠায়ে ঠায়ে। শ শ পৰিয়াল গৃহহাৰা হৈছে, শতাধিক জনে হেৰুৱাইছে প্ৰাণ। এতিয়াও অসম তথা উত্তৰ পূৰ্বৰ পৰিস্থিতি ভয়াবহ কৰি ৰাখিছে বান আৰু ভূমিস্খলনে।

অসমত বানৰ সংহাৰী ৰূপৰ মাজতে যোগাযোগ বিচ্ছিন্ন হৈ পৰিল অসম-ত্ৰিপুৰাৰ মাজত। শুকুৰবাৰে পুৱা কৰিমগঞ্জ বাইপাছৰ কাষৰ পোৱামাৰা আৰঅ’বিৰ এটা অংশ বানে উটুৱাই নিয়াত যোগাযোগ বিচ্ছিন্ন হৈ পৰে অসম আৰু ত্ৰিপুৰাৰ মাজত।

জিলা প্ৰশাসনে জানিবলৈ দিয়া মতে, শুকুৰবাৰে পুৱা প্ৰায় ৬ বজাত কৰিমগঞ্জ বাইপাছৰ অংশটো ছিগি যায়। যাৰ ফলত পথটোৰে যান-বাহনৰ চলাচল বন্ধ হৈ পৰে।

ইফালে যান-বাহনৰ চলাচলৰ বাবে বাবা হোটেলৰ পৰা কৰিমগঞ্জ টাউন হৈ পোৱামাৰলৈ বিকল্প পথৰ ব্যৱস্থা কৰা হৈছে। তদুপৰি ভগ্ন পথটো মেৰামতি কৰি আৱদ্ধ হৈ থকা যান-বাহন সমূহ মুকলি কৰাৰ ব্যৱস্থা কৰা হৈছে।