নিউজ ডেস্কঃ পথৰ ওপৰত টকাভৰ্তি বেগ এটা দেখি যিকোনো এজন ব্যক্তিৰে মন বিচলিত হোৱাটো স্বাভাৱিক। কিন্তু এগৰাকী ট্ৰেফিক আৰক্ষীৰ মন বিচলিত কৰিব নোৱাৰিলে কেইবা লাখ টকাৰে ভৰি থকা এটা বেগেও। যাৰ বাবে এতিয়া সৰ্বত্ৰে প্ৰশংসিত হৈছে ট্ৰেফিক আৰক্ষী জোৱানগৰাকী। তেওঁৰ এই সততাৰ শলাগ লৈ বিভাগৰ তৰফৰ পৰা পুৰস্কৃত কৰাৰ কথাও ঘোষণা কৰা হৈছে।
দৰাচলতে ছত্তীশগড়ৰ ৰায়পুৰৰ কায়াবন্ধা নিউত নিযুক্ত যান বাহন আৰক্ষীৰ কনিষ্টবল নীলম্বৰ সিনহাই শনিবাৰে পুৱা প্ৰায় ৮.৩০ বজাত বিমানবন্দৰৰ পৰা কৰ্তব্য সমাপন কৰি শিবিৰলৈ গৈ আছিল। সেই সময়তে ট্ৰেফিক কনিষ্টবলগৰাকীয়ে মানা অঞ্চলৰ অন্তৰ্গত ৰায় পাব্লিক স্কুলৰ সন্মুখৰ ৰাস্তাত এটা বগা বেগ প্ৰত্যক্ষ কৰে।
আৰক্ষী জোৱানজনে বেগটো পৰীক্ষা কৰাৰ সময়ত দেখা পায় যে বেগটো ২০০০ আৰু ৫০০ টকীয়া নোটেৰে ভৰি আছে। এই সন্দৰ্ভত আৰক্ষী কনিষ্টবলগৰাকীয়ে পৰৱৰ্তী সময়ত নিজৰ জ্যেষ্ঠ বিষয়াসকলক অৱগত কৰে আৰু নোট ভৰ্তি বেগটো থানাৰ চিভিল লাইনলৈ আনি জমা কৰে।
এএছপি সুখনন্দন ৰাথোৰে সংবাদ মাধ্যমক জনোৱা মতে, এই বেগৰ ভিতৰত প্ৰায় ৪৫ লাখ টকা নগদ ধন আছিল, যিটো থানা চিভিল লাইনে ১০২ জে.এফ. ইয়াৰ অধীনত উত্তৰাধিকাৰীৰ লেখ-জোখ অদাবী অৱস্থাত জব্দ কৰি কৰা হৈছে। থানাত নগদ ধনেৰে ভৰা বেগ এটা জমা কৰি সততাৰ উদাহৰণ দাঙি ধৰিছিল কনিষ্টবল নীলাম্বৰ সিনহাই। নীলাম্বৰ সিনহাক প্ৰশংসা কৰাৰ সময়তে আৰক্ষী মহাপৰিদৰ্শক আৰু জ্যেষ্ঠ আৰক্ষী অধীক্ষকে তেওঁৰ বাবে উপযুক্ত পুৰস্কাৰ ঘোষণা কৰিছে।
কনিষ্টবল নীলাম্বৰ সিনহাই জনোৱা মতে, তেওঁ যেতিয়া মানা অভিমুখে উভতি আহিছিল, তেতিয়া বেগটো ডিভাইডাৰৰ সিটো পাৰে পৰি আছিল। তেওঁ সিটো পাৰ পোৱাৰ সময়লৈকে এজন ভান চালকে বেগটো তুলি খুলি থৈছিল। কিন্তু নিষ্টবলজন অহা দেখি ভান চালকে বেগটো এৰি পলায়ন কৰে। কনিষ্টবল নীলাম্বৰে সন্দেহ কৰিছে যে ভান চালকজনে নোটৰ বাণ্ডিল লৈ পলায়ন কৰিব পাৰে।
বিমানবন্দৰৰ পথত স্থাপন কৰা চিচিটিভি কেমেৰাৰ সহায়ত এতিয়া আৰক্ষীয়ে ভ্যান চালকজন আৰু নোট ভৰ্তি বেগ পথত পেলাই যোৱা ব্যক্তিজনক বিচাৰিছে। লগতে জানিব পৰা গৈছে যে ভানখনৰ নম্বৰটো আৰক্ষীয়ে বিচাৰি পাইছে, বৰ্তমান আৰক্ষীয়ে বিচাৰি উলিওৱাত নিয়োজিত হৈ আছে।
ইফালে নোটভৰ্তি বেগটো উদ্ধাৰ হোৱাৰ ২৪ ঘণ্টা পাৰ হোৱাৰ পিছতো গৰাকীৰ সম্ভেদ লাভ নকৰাত এয়া ক’লা ধন হোৱাৰো আশংকা কৰিছে আৰক্ষীয়ে। চিচি টিভি কেমেৰাৰ সহায়ত বেগটোৰ গৰাকীৰ সন্ধান অভিযান অব্যাহত ৰাখিছে আৰক্ষীয়ে।
