জানিব পৰা মতে, শাওতলী চাহ বাগিচাৰ ৰাজেশ কৰ্মকাৰৰ ৩০ বছৰীয়া পুত্ৰ কুণাল কৰ্মকাৰে বাগিচাৰে আকাশ কুমী নামৰ এজন যুৱকৰ সৈতে যোৱা ১৫ মে’ত কামৰ সন্ধানত কেৰেলালৈ যাত্ৰা কৰিছিল।
কিন্তু যাত্ৰা পথতে অন্ধ্ৰপ্ৰদেশৰ কোনো এক স্থানত কুনাল কৰ্মকাৰৰ মৃত্যু ঘটা বুলি ফোনযোগে পৰিয়ালক জানিবলৈ দিয়ে লগত যোৱা আকাশ কুমীয়ে। যি খবৰে পৰিয়ালটোত হুৱাদুৱা লগায়।
কি পৰিস্থিতিত আৰু কিদৰে কুনালৰ মৃত্যু ঘটিল, সেই সন্দৰ্ভত আকাশ কুমীয়ে কোনো কথা পৰিয়ালক স্পষ্টকৈ নকোৱাত এতিয়া যুৱকজনৰ মৃত্যু সন্দৰ্ভতো ৰহস্যৰ সৃষ্টি হৈছে।
কুনালৰ পৰিয়ালে জানিবলৈ দিয়া মতে, আকাশ কুমীয়ে অন্ধ্ৰপ্ৰদেশৰ পৰা কুনালৰ মৃতদেহৰ এখন ফটোহে পৰিয়াললৈ প্ৰেৰণ কৰিছে। যাৰ বাবে এয়া এক হত্যাকাণ্ড বুলি সন্দেহ কৰিছে পৰিয়ালে।
