নিউজ ডেস্কঃ সোমবাৰে নিশা কৰ্ণাটকত সংঘটিত এক ভয়ংকৰ পথ দুৰ্ঘটনাত ৭ জনকৈ লোকে প্ৰাণ হেৰুওৱাৰ বিপৰীতে আহত হয় আন ২৬ জন লোক।
আৰক্ষীয়ে জানিবলৈ দিয়া মতে, নিশা কৰ্ণাটকৰ হুবলী চহৰৰ উপকণ্ঠ অঞ্চলত সংঘটিত হয় এই ভয়াবহ দুৰ্ঘটনা।
বাতৰি অনুসৰি, কলহাপুৰৰ পৰা বাংগালুৰু অভিমুখে এখন যাত্ৰীবাহী বাছ গৈ থকা সময়তে নিশা প্ৰায় ১ বজাত বিপৰীত দিশৰ পৰা আহি থকা এখন ট্ৰাকত প্ৰচণ্ড জোৰে খুন্দা মাৰে।
দুৰ্ঘটনাটোত বাছ আৰু ট্ৰাকৰ দুয়োজন চালকসহ ৭ জন লোকৰ মৃত্যু ঘটাৰ লগতে বাছখনত থকা ২৬ জন যাত্ৰী গুৰুতৰভাৱে আহত হয়।
বাছখনে এখন ট্ৰেক্টৰ অভাৰটেক কৰাৰ সময়তে এই দুৰ্ঘটনা সংঘটিত হয় বুলি আৰক্ষীয়ে জানিবলৈ দিছে।
ইফালে নিশাই ঘটনাস্থলীত আৰক্ষীৰ দল উপস্থিত হৈ আহত সকলক হুবলীৰ কিমছ হাস্পতাললৈ প্ৰেৰণ কৰে।
ঘটনা সন্দৰ্ভত আৰক্ষীয়ে এটা গোচৰ ৰুজু কৰি তদন্ত আৰম্ভ কৰিছে।
