ডিজিটেল ডেস্কঃ ঘোষণা কৰা হ’ল বিশ্বৰ আটাইতকৈ সন্মানীয় ১২৫ সংখ্যক শান্তিৰ নোবেল বঁটা। ২০২৬ বৰ্ষৰ এই সৰ্বোচ্চ সন্মান আগবঢ়োৱা হৈছে দক্ষিণ আফ্ৰিকাৰ বিশিষ্ট আইনবিদ তথা মানৱ অধিকাৰ কৰ্মী নৱনেথম নাভি পিল্লাইলৈ। আন্তঃৰাষ্ট্ৰীয় আইনৰ সুৰক্ষা আৰু বিশ্বজুৰি শান্তি প্ৰতিষ্ঠাত আগবঢ়োৱা আজীৱন অৱদানৰ স্বীকৃতিস্বৰূপে শুক্ৰবাৰে নৰৱেজিয়ান নোবেল সমিতিয়ে এই ঐতিহাসিক ঘোষণা কৰে।
৮৫ বছৰীয়া ভাৰতীয় মূলৰ এই তামিল আইনবিদগৰাকীয়ে ৰাষ্ট্ৰসংঘৰ মানৱ অধিকাৰ আয়োগৰ উচ্চায়ুক্ত হিচাপে কাৰ্যনিৰ্বাহ কৰিছিল। বিশ্বজুৰি যুদ্ধাপৰাধ, গণহত্যা আৰু মানৱতাহীন অপৰাধৰ বিৰুদ্ধে আইনী যুঁজ দিয়াত এক অগ্ৰণী ভূমিকা পালন কৰি আহিছে পিল্লাইয়ে। বঁটা ঘোষণা কৰি নোবেল সমিতিৰ অধ্যক্ষ জোৰ্গেন ৱাটনে ফ্ৰাইডনেছে কয় যে বৰ্তমান বিশ্বত যুদ্ধ আৰু সংঘাত ব্যাপকভাৱে বৃদ্ধি পাইছে, যাৰ ফলত আন্তঃৰাষ্ট্ৰীয় আইন ব্যৱস্থা প্ৰচণ্ড চাপ আৰু ভাবুকিৰ সন্মুখীন হৈছে। এনে সংকটপূৰ্ণ সময়ত বিশৃংখলতা আৰু শৃংখলাৰ মাজৰ সুক্ষ্ম সীমাৰেখাডাল ৰক্ষা কৰিছে কেৱল আইন আৰু ন্যায়িক ব্যৱস্থাই।
উল্লেখযোগ্য যে, বৰ্ণবৈষম্যৰ বিৰুদ্ধে আপোচবিহীন সংগ্ৰাম চলোৱা নৱনেথম নাভি পিল্লাই ১৯৬৭ চনত দক্ষিণ আফ্ৰিকাৰ নাটাল প্ৰদেশত আইন চৰ্চা আৰম্ভ কৰা প্ৰথমগৰাকী মহিলা হিচাপে পৰিগণিত হৈছিল। পিছলৈ তেওঁ নেলছন মেণ্ডেলাকে ধৰি বৰ্ণবৈষম্যবিৰোধী বহু সংগ্ৰামী নেতাৰ হৈ আদালতত ওকালতি কৰিছিল। দক্ষিণ আফ্ৰিকাৰ উচ্চ ন্যায়ালয়ত সেৱা আগবঢ়োৱা তেওঁৱেই আছিল প্ৰথমগৰাকী কৃষ্ণাঙ্গ মহিলা ন্যায়াধীশ।
ৰুৱাণ্ডা ট্ৰাইবিউনেলৰ বিচাৰপীঠত থকা সময়ছোৱাত ধৰ্ষণ আৰু যৌন নিৰ্যাতনকো গণহত্যা তথা মানৱতাৰ বিৰুদ্ধে অপৰাধ হিচাপে গণ্য কৰাৰ ঐতিহাসিক সিদ্ধান্ত পিল্লাইৰ পদক্ষেপৰ ফলতেই সম্ভৱ হৈ উঠিছিল। তদুপৰি, পেলেষ্টাইন অধিকৃত অঞ্চল সম্পৰ্কীয় ৰাষ্ট্ৰসংঘৰ স্বতন্ত্ৰ তদন্ত কমিটীৰ মুৰব্বী হিচাপে গাজাত ইজৰাইল চৰকাৰে চলোৱা ধ্বংসযজ্ঞক গণহত্যা হিচাপে অভিহিত কৰি তেওঁ সাহসিকতাৰ পৰিচয় দিছিল। বৰ্তমান তেওঁ ৰোহিংগীয়া মুছলমানসকলৰ ওপৰত চলোৱা গণহত্যা সম্পৰ্কীয় বিচাৰত আন্তঃৰাষ্ট্ৰীয় ন্যায়ালয়ৰ বিচাৰপীঠত কাৰ্যনিৰ্বাহ কৰি আছে।
