নিউজ ডেস্কঃ অভিযানৰ সময়তে ভূস্খলনত শ্বহীদ হ’ল এগৰাকী সেনা জোৱান।
এই শোকাবহ ঘটনা সংঘটিত হয় অৰুণাচল প্ৰদেশৰ টাৱাঙত।
অৰুণাচল প্ৰদেশত অব্যাহত থকা বৰষুণৰ মাজতে শুকুৰবাৰে এক অভিযান চলাইছিল ভাৰতীয় সেনাৰ এটা দলে।
সেই সময়তে টাৱাঙত সংঘটিত ভূ স্খলনত কম-বেছি পৰিমাণে আঘাতপ্ৰাপ্ত হয় কেইবাগৰাকীও জোৱান।
এই ভূমিস্খলনতে সন্ধানহীন হৈ পৰে ভাৰতীয় সেনাৰ চুবেদাৰ এ এছ ধগাল।
জোৱানজনৰ সন্ধানহীনতাৰ পিছত তৎক্ষণাত ভাৰতীয় সেনাই সমগ্ৰ অঞ্চলটোত অভিযান চলায় যদিও এশৰো অধিক জোৱানৰ দিনজোৰা প্ৰচেষ্টাৰ পিছতো কোনো সন্ধান নোলাল চুবেদাৰ এ এছ ধগালৰ।
পিছত শনিবাৰে পুনৰ অভিযান চলাই অৱশেষত ভাৰতীয় সেনাই উদ্ধাৰ কৰিবলৈ সক্ষম হয় শ্বহীদ জোৱানগৰাকীৰ মৃতদেহ।
শ্বহীদ জোৱানজনক শ্ৰদ্ধাঞ্জলি জনোৱাৰ উদ্দেশ্যে দেওবাৰে টাৱাং এডভান্সড লেণ্ডিং গ্ৰাউণ্ডত এক শ্ৰদ্ধাঞ্জলি অনুষ্ঠানৰ আয়োজন কৰে ভাৰতীয় সেনাই।
