নিউজ ডেস্কঃ শীঘ্ৰে শ্ৰীলংকাৰ দৰে হ’ব অসমৰ অৰ্থনৈতিক অৱস্থা।
সংবাদ মাধ্যমৰ সন্মুখত এই শংকা ৰাইজৰ দলৰ সভাপতি তথা বিধায়ক অখিল গগৈৰ।
অসম চৰকাৰৰ ওপৰত ঋণৰ পৰিমাণ সন্দৰ্ভত প্ৰতিক্ৰিয়া ব্যক্ত কৰি গগৈয়ে কয় যে কেন্দ্ৰীয় চৰকাৰে ৰাজ্য চৰকাৰক ঋণ অনুমোদন দিয়া বন্ধ কৰি দিছে।
তেওঁ কয়, ‘২০২২ চনৰ নৱেম্বৰৰ পৰা অসম চৰকাৰৰ ঋণৰ পৰিমাণ ১,২৭,০৭৩ কোটি টকা।
২০১৬ চনলৈকে ঋণৰ পৰিমাণ আছিল ৪১,৯৪৬ কোটি টকা।
বৰ্তমান শ্ৰীলংকাৰ দৰে অৰ্থনৈতিক সংকটৰ সন্মুখীন হোৱাৰ পৰা আমাৰ ৰাজ্যখন বহু দূৰত নহয়।”
ইয়াৰ পূৰ্বে অসম বিধানসভাৰ বাজেট অধিৱেশনৰ প্ৰথম দিনাই অখিল গগৈয়ে অসম চৰকাৰৰ বিৰুদ্ধে আক্ৰমণ চলাইছিল যে চৰকাৰে সদায় গুৰুত্বপূৰ্ণ বিষয়সমূহ নসাৎ কৰিবলৈ চেষ্টা কৰি আহিছে।
অখিল গগৈয়ে মুখ্যমন্ত্ৰী হিমন্ত বিশ্ব শৰ্মা আৰু প্ৰধানমন্ত্ৰী নৰেন্দ্ৰ মোডীক ভাৰতৰ দুই ‘হিটলাৰ’ বুলিও অভিহিত কৰিছিল।
আনহাতে কোটি কোটি টকা ব্যয় কৰি বিহুক গীনিজ বুক অৱ ৱৰ্ল্ড ৰেকৰ্ডত অন্তৰ্ভূক্তি কৰিবলৈ অসম চৰকাৰে গ্ৰহণ কৰা পদক্ষেপকো তীক্ষ্ণ সমালোচনা কৰি আহিছে অখিল গগৈয়ে।