বান ক্ষতিপূৰণৰ দাবীত মুখ্যমন্ত্ৰীৰ বাসগৃহৰ সন্মুখত ৰাইজৰ দলৰ উত্তাল প্ৰতিবাদ; কৃষক মুক্তি আৰু ৰাইজৰ দলৰ কেইবাজনো নেতাক আটক

গুৱাহাটীঃ বাৰিষাৰ বিভীষিকাই সৰ্বস্বান্ত কৰা বানাক্ৰান্তৰ উচিত ক্ষতিপূৰণ আৰু সাহায্যৰ দাবীত উত্তাল হৈ পৰিল ৰাজধানী চহৰ গুৱাহাটী। মুখ্যমন্ত্ৰীৰ চৰকাৰী বাসগৃহ ঘেৰাও কৰি বৃহস্পতিবাৰে ৰাইজৰ দলৰ নেতা-কৰ্মীসকলে এক বিশাল প্ৰতিবাদী কাৰ্যসূচী ৰূপায়ণ কৰে। এই প্ৰতিবাদৰ মূল দাবী আছিল বানাক্ৰান্তৰ উচিত ক্ষতিপূৰণ (বান ক্ষতিপূৰণ)।

ৰাইজৰ দলৰ সভাপতি তথা বিধায়ক অখিল গগৈৰ আহ্বানৰ পিছতেই এই প্ৰতিবাদী সমদলত সমবেত হয় দলটোৰ শ শ কৰ্মী-সমৰ্থক। বিশেষকৈ শিৱসাগৰ, চৰাইদেউ আৰু যোৰহাট জিলাৰ বানাক্ৰান্ত পৰিয়ালসমূহৰ বাবে তৎকালীন বিত্তীয় সাহায্য প্ৰদানৰ দাবীত প্ৰতিবাদকাৰীসকলে ক’লা পতাকা প্ৰদৰ্শন কৰি চৰকাৰবিৰোধী তীব্ৰ শ্ল’গান তোলে। ক্ষতিগ্ৰস্ত বাসগৃহ পুনৰ্নিৰ্মাণ আৰু ধ্বংসপ্ৰাপ্ত ৰাজহুৱা আন্তঃগাঁথনি মেৰামতিৰ বাবে উচিত ক্ষতিপূৰণ দাবী কৰে প্ৰতিবাদকাৰীসকলে।

ইফালে, প্ৰতিবাদৰ উমান পাই প্ৰশাসনে মুখ্যমন্ত্ৰীৰ বাসগৃহৰ চাৰিওফালে কটকটীয়া নিৰাপত্তা বেষ্টনী গঢ়ি তোলে। প্ৰতিবাদকাৰীৰ দলটোৱে আৰক্ষীৰ বেৰিকেড ভাঙি মুখ্যমন্ত্ৰীৰ বাসগৃহ অভিমুখে আগবাঢ়িবলৈ চেষ্টা কৰাৰ সময়তেই আৰক্ষীয়ে প্ৰতিৰোধ গঢ়ি তোলে আৰু দুয়োপক্ষৰ মাজত তীব্ৰ টনা-আঁজোৰাৰ সৃষ্টি হয়। পৰিস্থিতি উত্তপ্ত হৈ পৰাত আৰক্ষীয়ে কৃষক মুক্তি সংগ্ৰাম সমিতিৰ সাধাৰণ সম্পাদক বিদ্যুৎ শইকীয়া আৰু ৰাইজৰ দলৰ নেতা ধৈৰ্য কোঁৱৰকে ধৰি কেইবাগৰাকীও নেতা-কৰ্মীক আটক কৰি অঞ্চলটোৰ পৰা লৈ যায়।

ৰাইজৰ দলে নামনি আৰু উজনি অসমত সৃষ্টি হোৱা এই বানপানী প্ৰাকৃতিক নহয় বৰঞ্চ মানৱসৃষ্ট কাৰণৰ ফলতহে হোৱা বুলি অভিযোগ তোলে। এই ব্যাপক ক্ষয়-ক্ষতিৰ আঁৰত থকা কাৰণসমূহ উদঙাই উলিয়াবলৈ কেন্দ্ৰীয় তদন্তকাৰী সংস্থা চমুকৈ চিবিআইৰ জৰিয়তে এক উচ্চ পৰ্যায়ৰ তদন্তৰো দাবী জনায় দলটোৱে।

উল্লেখ্য যে, শেহতীয়া বিধ্বংসী বানৰ কবলত পৰি শিৱসাগৰ, চৰাইদেউ আৰু যোৰহাটৰ বিস্তীৰ্ণ অঞ্চলত কৃষিভূমি, ঘৰ-দুৱাৰ আৰু অন্যান্য সম্পত্তিৰ ব্যাপক ক্ষতিসাধন হৈছিল। চৰকাৰী সাহায্যৰ নামত প্ৰতাৰণাৰ অভিযোগ তুলি সাব্যস্ত কৰা এই প্ৰতিবাদক আৰক্ষীয়ে বলপ্ৰয়োগ কৰি আঁতৰাই অৱশেষত পৰিস্থিতি নিয়ন্ত্ৰণলৈ আনে। বানাক্ৰান্তৰ ক্ষতিপূৰণৰ দাবী (বান ক্ষতিপূৰণ) এই প্ৰতিবাদৰ কেন্দ্ৰবিন্দু হৈ পৰে।