নিউজ ডেস্কঃ ৰে’ল যাত্ৰাৰ সময়তে প্ৰসৱ বেদনাত ভুগা এগৰাকী প্ৰসুতিয়ে ষ্টেচনতে জন্ম দিলে সন্তান।
ৰে’ল কৰ্মচাৰী আৰু ৰে’লৱে আৰক্ষীৰ সহযোগত ৰে’লৱে চিকিৎসকে প্লেটফৰ্মত প্ৰসৱ কৰোৱায় মহিলাগৰাকীক।
পহিলা ফেব্ৰুৱাৰীত এই ঘটনা সংঘটিত হয় ৰঙিয়া জংচনত।
জানিব পৰা মতে, ১৫১৬০ কামৰূপ এক্সপ্ৰেছত যাত্ৰাৰ সময়তে প্ৰসৱ বেদনা অনুভৱ কৰে সন্তানসম্ভৱা মহিলাগৰাকীয়ে।
জংচনত মহিলাগৰাকীৰ পৰিস্থিতি লক্ষ্য কৰি কৰ্তব্যৰত টিকট নিৰীক্ষক, ৰে’লৱে কৰ্মচাৰী আৰু আৰ পি এফৰ জোৱান সহায়ৰ বাবে আগবাঢ়ি আহে।
কিছু সময় পিছতে সেই স্থানত ৰে’লৱে চিকিৎসকো উপস্থিত হোৱাত চিকিৎসকৰ সহায়ত মহিলাগৰাকীয়ে জন্ম দিয়ে এটি কন্যা সন্তান।
বৰ্তমান মাতৃ আৰু কন্যা দুয়োগৰাকীয়েই সুস্থ হৈ থকা বুলি জানিব পৰা গৈছে।
পৰৱৰ্তী সময়ত দুয়োকে উপযুক্ত চিকিৎসাৰ বাবে ৰঙিয়াৰ চৰকাৰী হাস্পতাললৈ প্ৰেৰণ কৰা হয়।
